Crónica da excursión do Club de Lectura: Libraría Versus, por Candela Martínez

Vou falar da última visita, que foi á libraría Versus, que está no centro de Vigo, na rúa Venezuela.

Alí coñecemos a libraría, que tiña moitos exemplares de todo tipo de libros, e cada un dos membros colleu o que máis lle gustou tendo en conta o seu prezo, o autor ou autora e o seu contido. Con eses libros imos facer unha actividade este trimestre no club de lectura.

Fomos moi contentas de volta ao instituto desde a Praza de España. Para min esta excursión foi moi interesante.

Crónica da excursión do Club de Lectura: Biblioteca Penzol, por Anabel Fernández Rial

A excursión do Club de Lectura o día 20 de outubro foi moi entretida, educativa e valiosa. Aprendemos moitas cousas en Edicións Xerais, como por exemplo facer a maqueta dun libro que se vai imprimir e logo envialo a unha imprenta.

Na biblioteca Penzol descubrimos porque se chama dese xeito, tamén que é un bibliófilo e outras cousas da nosa historia, a través dun power-point que nos puxeron. Tamén soubemos quen foi Francisco Fernández del Riego, que estivo moi relacionado con esta Fundación.

Despois diso visitamos os locais da Fundación: onde estaban depositados os libros, cales as súas condicións de conservación e coñecemos o local dedicado á consulta dos fondos, ademais de visitar a pinacoteca e mais a reprodución dun cuarto que era dun ensaísta e galeguista chamado Ramón Piñeiro. Tamén nos regalaron a cada un dos membros un volume titulado Fermín Penzol. Unha obra para un país, que trae moita información sobre este personaxe, que xa coñecemos máis.

Como durante a excursión chovía, e fomos andando, foi en verdade unha excursión entretida, educativa e refrescante.

Crónica da excursión do Club de Lectura: Edicións Xerais, por Jennifer Rodríguez, 2º da ESO

En Edicións Xerais, atendendo ás explicacións sobre que é unha editorial

O xoves pasado, 27 de outubro, fixemos unha excursión todos os membros do Club de Lectura “Lendo no Galiñeiro”. Esta excursión gustoume moito.

Na excursión recalamos en tres lugares. A min correspóndeme falar das miñas impresións do primeiro sitio que visitamos, que foi Edicións Xerais, que está na rúa Doutor Marañón 12, en Vigo.

A  visita gustoume moito xa que nos ensinaron moitas cousas e tanto Manuel Bragado, o director, como Celia Torres, a directora de prensa e promoción, tratáronnos moi ben e con moita amabilidade. Ensináronnos as distintas partes dun libro e mostráronnos como organizan o traballo cando se van facer os libros; tamén nos ensinaron uns arquivos de hai moito tempo -que isto foi o que máis me sorprendeu- no que gardaban as referencias que saíran dos libros editados na prensa. E tamén nos explicaron moitas máis cousas relacionadas coa preparación dos libros: a corrección dos mesmos, a maquetación, etc., e todo se facía nuns ordenadores impresionantes.

Ao marcharmos de alí vimos a Marcos Calveiro e mais a Fran Alonso -quen nos asinou uns libros-. Finalmente regaláronnos a cada unha de nós un  exemplar dunha tradución dun libro precioso de Jack London: A chamada da selva, co que traballaremos no Club.

Foi un saída moi instrutiva e agradable.

Nace “Lendo no Galiñeiro 2” o Club de Lectura do IES Valadares para o resto da comunidade educativa

O Club de Lectura “Lendo no Galiñeiro”, compaxinando a súa actividade coa que se mantén co alumnado do IES Valadares dá comezo á creación dun novo “Club de Lectura”, neste caso destinado á comunidade educativa en xeral, persoal non docente, persoal administrativo e anpa do centro, de cara á lectura de tres títulos ao longo do curso escolar. O proxecto de actividades lectoras circunscribirase á lectura dun determinado título que se fará cadrar, aproximadamente, por trimestre.

Alén da lectura persoal , o coordinador do mesmo realizará –se for necesario- algún encontro previo cos lectores e lectoras, para preparar a visita do autor ou autora correspondente. Este primeiro trimestre a actividade consistirá na lectura do libro In vino  veritas, de Francisco Castro (Ed. Galaxia) e o encontro co autor terá lugar no propio centro o luns, 30 de xaneiro de 2012, ás seis e media da tarde. As persoas interesadas en formar parte do Club de Lectura para adultos poderán apuntarse nunha listaxe que se atopa na conserxería do centro que se atopará a disposición de quen lle interese desde o 7 de novembro até o 18 de novembro e no que debedes apuntar o voso enderezo de correo electrónico. Os membros da anpa pódeno comunicar ao enderezo electrónico do centro ( ies.valadares@edu.xunta.es ). Club de Lectura“Lendo no Galiñeiro 2”.

Reportaxe fotográfica da saída do Club de Lectura Lendo no Galiñeiro (outubro 2011)

Velaquí algunhas das fotografías que testemuñan o paso polos tres espazos que visitamos a semana pasada: a) Edicións Xerais; b) Biblioteca e Fundacións Penzol e F. Fernández del Riego e c) Libraría Versus.

A crónica das visitas farase a través dalgún membro do Club e irase colgando no blogue oportunamente. Grazas ás empresas e entidades que nos acolleron tan amablemente e que tanto nos fixeron aprender, nomeadamente a Manuel Bragado e Celia Torres, de Edicións Xerais; Francisco Domínguez, director da Biblioteca Penzol  e Marián Vidal, e Sabela, da Libraría Versus, de Vigo.

a. Edicións Xerais.  Manuel Bragado, director da editorial explicounos o funcionamento da editorial, e xunto con Celia Torres, directora de promoción, percorremos os distintos espazos da editorial coñecendo as funcións de cada sección.

Manuel Bragado explicando que é unha editorial

b. Visitmos logo a biblioteca e as Fundacións Penzol e Fernández del Riego. Inicialmente Marián Vidal mostrounos e explicounos un power-point sobre Fermín Penzol.

Visitamos os espazos da biblioteca...

 

Vimo como se catalogaban con fichas os libros... (na foto Marián, a nosa cicerone, e Celina)

 

E tras ver como se custodiaban os libros, como é a pinacoteca de Fernández del Riego e o espazo da mesa camilla de R. Piñeiro, finalmente, a foto de familia nas escaleiras interiores da Casa Galega da Cultura.

c. Libraría Versus

Na rúa Venezuela........ remexemos ....... e mercamos moitos libros!

 
 
 

Actividade extraescolar: visita a Edicións Xerais, Biblioteca Penzol e libraría Versus

Mañá 27 de outubro realizaremos a saída programada. Sairemos ás 9:15 do centro con destino a Edicións Xerais, onde nos amosarán o proceso de confección dun libro, desde que chega o orixinal até que se envía ao prelo.

Despois visitaremos os locais da Biblioteca Penzol: a biblioteca máis relevante do mundo en canto a fondos catalogados en galego ou que teñan que ver con Galicia. Veremos como é o seu funcionamento, como se fundou a biblioteca e cal é á súa función.

Por último visitaremos a libraría Versus, onde os membros do club terán ocasión de mercar un libro distinto arredor do que realizaremos unha actividade da que se vos informará.

O retorno está previsto arredor das 14:00, con chegada ao propio centro.

Visita de Fran Alonso: A poesía é un globo

Onte, 17 de outubro, ás tres da tarde, realizouse no Club de Lectura a primeira das actividades programadas para este curso escolar: a visita, e recital de poesía, do escritor Fran Alonso. A finais do curso pasado os membros do club leran O meu gato é un poeta: un apaixonante e intenso libro de poesía e, entre outras cousas, a iso veu o escritor: a dicirnos que a poesía  pode ser moi divertida e que o podemos pasar moi ben léndoa, e abofé que o conseguiu.

Baseándose en textos de O meu gato é un poeta, Fran Alonso realizou un percorrido por poemas que se inclúen no libro, mais tamén doutros de escritores do noso tempo ou non, dentro dun espectáculo que el chama “A poesía é un globo”… e que adaptou para 1º e 2º da ESO. Un globo que vimos como se inchaba, como se desinchaba ou como estoupaba, que se enchía de palabras que poden voar, ou facer ruído, ou susurrar ou, loxicamente, tamén miañar.

Falounos tamén do seu último libro –Ninguén-, e sobre todo dos “hoax”…, eses bulos que corren por internet e cos que hai que ter un pouco de conta. Ao final, asinou algúns exemplares coa promesa de non deixar pasar moito tempo sen volver. Grazas Fran!

Velaquí algunhas fotos do encontro:

                                                 Fran Alonso e o seu globo

                                                       Recitando un poema “con paixón”

 

                                                      Todas ben atentas!

                                              Asinando algúns exemplares

Autorizacións (importante)

Mañá, 13 de outubro, á hora do recreo DEBEDES RECOLLER AS AUTORIZACIÓNS en conserxería para poder asistir ao encontro organizado o vindeiro luns. Debédelo traer asinado polos vosos pais, nais ou titores/as,  e volvelo no mesmo sitio este próximo venres día 14. Moitas grazas e non vos despistedes: é un requisito preciso para poderdes quedar no centro entre a 6ª hora de clase e a 1ª da tarde.

O meu gato é un poeta (información)

Por se queredes refrescar a memoria sobre o libro de Fran Alonso, lembrade que entre outras posibilidades ten a de ser un libro interactivo, premendo aquí e mais aquí (a clave tédela no propio libro) dispoñedes de moita e valiosa información.

SOMOS MOITOS MÁIS: GRAZAS!!!

Este pasado mércores vímonos todos e todas gratamente sorprendidos polo aumento exponencial de novos membros do noso club de lectura. Quen dixo que non había alumnado que gustase de ler?
En datas vindeiros subiremos as fotos de grupo dos membros. Mentres tanto estade atentos ao blogue, no que se vos irá informando de novidades e proxectos: o primeiro é a visita de Fran Alonso, de quen o ano pasado lemos O meu gato é un poeta, o vindeiro luns día 17 de outubro. Xoves, tras o festivo, teremos unha breve xuntanza para preparar a visita e repartir as autorizacións.

Grazas!!!